شركة امانه اف اكس هي شركة تداول انشات تقريبا من سنة 2017 وكان ليها موقع ولكن الان تم اغلاق الموقع نظرا لتجوازات الشركة ,الموضوع بيبدا
حضرتك هتلاقي اعلان من اعلانات الشركة على اي من المواقع هتبدا تسجل وبعد كدا هيكلمك مندوب من الشركة علشان يقنعك بالوهم هيقنعك انك تودع مبلغ الف دولار كبداية في حالة انك عايز تتداول بنفسك و لو حابب ان الشركة هي اللي تتداول عنك تودع مبلغ خمسة الاف دولار وهقولك ايه اللى بيتم فى الحالتين دلوقتي
فى الحالة الاوالى وهي الاف دولار هيكلمك مسئول الحساب ويبدا معاك عمليات بسيطه والربح بتاعها هيبقي بسيط جدا علشان يجري ريقك زي مابيقولوا وكل العمليات دي ناجحه على فكرة
انت كضحية بعد مابيتم معاك كدا ايه اللى بيحصل بتبدا تفكر انك تخلى الشركة هي اللى تتداول بالنيابه عنك ممكن علشان ضيق الوقت ودا كان في حالتي او الطبيعي انك بتطمع في مكسب اكبر فبتكلم المسئول بتاعك علشان تودع ومن هنا تبدا الشركة تمص فلوسك
هتودع المبلغ وتلاقي ان حسابك تضخم مره واحده وبدل الخمسه بقوا عشرة وعشرين وتلاتين فهتكلم المندوب علشان تسحب اموالك ومن هنا تبدا المشاكل بينك وبين الشركة الاول هيبدا يكلمك عن ان فيه عمولات لازم تدفعها ونسبنها والكلام ده فهتدفع طبعا ويديك معاد فى التاني و يتحجج بمشاكل وهميه دا كله علشان يقدر يسحب منك اكبر قدر من الاموال و اول مايحس ان خلاص مفيش امل منك او ان فلوسك خلصت حاجه من الاتنين يا هيختفي ومش هتعرف تتواصل معاه وكل لما تتواصل هيكلمك واحد شكل ويحاول يجرب معاك طريقة تانية في سحب الفلوس كمثال ان الشركة عليها مشاكل وان فيه مكتب محاماه كويس هيرجعلك فلوسك فلازم طبعا تدفعله وهكذا و المكتب دا طبعا تبعهم فياخد الفلوس ويختفي وترجع تاني تدور على فلوسك
او الحاله التانيه ان انت تصحي الصبح تلاقي نفسك خسرت كل فلوسك وحسابك اتصفر ودي اغلب الشركات بتعملها
انا من تجربتي دي استفدت ان لوهتداول هتداول بنفسي حتي لوهخسر لاني اكيد هتعلم
ثانيا اني اسال على الشركة اللي هيودع فيها فلوسي كويس جدا وادور اكتر من مره وماتستعجلش لان اي شركة نصابه هتحاول تخليك ماتدورش كويس وتحاول تعملك عروض وهميه علشان تجري تودع اموالك فيها فخلي بالك
ثالثا لوانت جديد في التداول ابدا بمبالغ صغيرة حتي لوخسرتها تبقي استفد من التجربة وماتزعلش على المبلغ اللي ضاع لان كل حاجه مكسب وخسارة
دي كانت تجربتي مع التداول حبيت اشاركها معاكم علشان الشركات النصابه كترت اوي فخلوا بالكم
Comments
Post a Comment